Baqadr E paimaana E takhaiyyul, suroor her dil mein hai khudi ka
Agar na ho ye farayb E paiham, to dam nikal jaye aadmi ka
Bas ek ehsaas E naa-rasaii, na josh us mein na hosh usko
JunuN pe haalat raboodgii ki, khirad pe aalam ghunoodgi ka
Hai rooh tarikiyoN mein hairaN, bhujha hua hai chiragh E manzil
Kahin sar E raah yeh musaafir paTak na de bojh zindagi ka
Khuda ki rahmat mein bhool baithuN yahi na manii hai iske waez
Wo abr ka muntazir khaRa ho, makaan jalta hai jab kisi ka
Wo lakh jhukwa le sar ko mere, magar ye dil ab nahi jhuke ga
K kibreyaii se bhi zeyada ,mizaaj naazuk hai bandagii ka
‘Jamil’ hairat mein hai zamaana , mere taghazzul ki muflisi per
Na jazba E ‘Ijtiba E Rizvi’, na kaif ‘Perwez Shahidi’ ka
Syed Kazim Ali ‘Jamil Mazhari‘
No comments:
Post a Comment